..كان فيه ثوره.....

كان ياما كان ويحكى أن ...
أن إيييه؟؟
كان فيه ثوره.....
بتقول إيييه ؟؟
... باقوللك ثوره...
ثورة إيييه ؟؟
ضد الظلم.. وضد السرقه... وضد الرشوه
وحصل إيييه ؟؟
قاموا الناس وحلفوا مايمشو إلا لما...
لما إيييه ؟؟؟
لما الناس الوحشين يمشوا..
يمشو منيين ؟؟ ووحشيين إيييه ؟؟
بص يا سيدى ..إحنا كنا ساعتها كتير.. قول مليون..
ها وبعديين؟؟
كنت تشوفنا تقول دول واحد ...مش مليون..
كنت تلاقى ياسين بيصلى.... وجنبه إيفون..
او بيزعق أخوهم بطرس واللى شايله.. الشيخ مأمون..
وعيل قالوا عليه واد سييس.. علشان شايل ال"أى فون"
وكنت تلاقى طبيب ومهندس ..وتكنوقراط والشيوعيوون
والزبال ..واللى عامل دوجلاس.. واللى لابس البوبيون
وزيزى وسونيا ومرسى وبهجت ..و الواد سيكا.. والمأذون
دقن تلاقى .. وال تاتووه... والهوت شورت والبنطلون
أيوه إنجز... ها وبعدين؟؟
الملاييين دولم كانوا واحد .. وكل واحد كان مليوون
كله نازل.. لهدف واحد.. الظالم يمشي .....والفاسدون
وكل الناس دول وقفوا فين؟؟

فى التحرير وف راس التين والمحله والسويس و ف كل مكان
كله عنده روح الثوره .. كله بيصرخ فى الميدان
كل الناس كانوا إيد واحده.. ضد الفاسد الجبان
طيب نجحوا؟؟
طبعا نجحوا .. بفضل الله.. وباتحادهم والإيمان
أمال ليه بتقولى ياإبنى ...يحكى أن ..وكان ياماكان؟؟؟
أصل الدنيا بعدها باظت .. تاهت ... ماعت ... صارت طين
كله قاللك ..يالله نفسى ألحق آخد لى ..القرشين
واللى مش معايا ..ضدى.. وإحنا ..وهما.. والباقى تانيين
والفرقه دبت فى الصف.. والعصبيه.. ونوع الدين
واللى يقولك.. دى بلاد بره.. واجنده .. والسلفيين
واللى فلولى .. واللى عصامى.. والليبرالى ... والصايعيين
فجأه الملايين اللى كانوا واحد... بقت الدنيا ميتين مليوون
كله يقولك... انا فاهم جامد.. أما الباقى واطى.. ودون
وانا لوحدى مخلص وطنى... والتانيين "عملائيوون"
طيب ليه كل الإفلام دى... ماكانش معاكم واحد يفهم؟؟
إسكت ساكت.. قطع لسانك .. ده مش واحد.. دولم مجلس
ناس كباره.. قاده.. ابطال ... خبره.. وما حدش بيهــيس
دول عارفينا.. أكتر منا... وعارفيين حتى سعر الترمس
دبة نمله.. تحصل ..تلقى.. فجأه ..هووووب..إنعقد المجلس
طيب إييه... ما الناس آهى حلوه.. أمال إييه؟؟
أمال إيييييه؟؟ ... إحنا اللى بنسأل ... حد يعبرنا يا باهوات..
فات دلوقتى ... "بعد ما بابا حسنى عملها " و.. حبّـلنا ياباشوات..
فات من عمر بلدنا.. تسع أشهر.. وبلدنا ولدت .. كلماااات..
مش شايفيين غير حبة كهنه.. ضيع... صيع... مومياواات..
الظاهر ... خايفين نعدلها... لا يتقفشو.. بالفلوسااات..
طيب ... نوعدكوا يا باهوات... إمشوا وهاتاخدوا ضمانات..

بس يا واد ..إنت بقى ..إخرس ..ما تزعلشى الأفندمات؟؟
يالله ياباشا.. قوم شوف شغلك.. شعبك مستنى القرارات..
يبارك ربى ف حكمة علمك ..و ف رؤيتكم للصالحات..
انت سيادتك زى الفل.... وبتفهم لغة الأيونات ..
واحنا اللى نستاهل الجزمه.. وادينا خدناها "فى العيد" ..أمانات..
بس نبوس إيدكم بقى نخلص.. إنجزوا يا سيادة اللواءات..
بطلوا تشربوا شوربة زحلف.. وإشتروا فزبه بسرعات..
وإوعوا تخلونا .. نقول تانى .. ثوره لغاية الممات..
والثوره.. اللى انتم بتقولوا... حميتوها من كل شيطان..
مش هانسيبها .. تصبح ذكرى .. ويحكى أن وكان ياما كان..
يا تكملوا ويانا للشاطىء... يا نعين غيركم.. ربان..
أصلنا .."يا سيادتك" فى يناير قولـنا بلدنا ماهياش تركه...
وأدينا أهوون فى نوفمبر... برضه "سيادتك" ما إحناش شركه...
يعنى سيادتك .."أبوس زلومتك " ... ظبط نفسك.. وإوعى تقولى يحكى أن ..وكانت ثوره.. وكان ياما كان..
يا إما ياباشا "وحياة خالتك"... هاتبقى سعادتك ... -والرجاله - ...يحكى أن.. كان فيه مجلس وكان ياما كان..